॥ श्री शंकराचार्य कृतं लक्ष्मीनृसिंहकरावलम्बस्तोत्रम् ॥
॥ శ్రీ శంకరాచార్య కృతం లక్ష్మీనృసింహకరావలమ్బస్తోత్రమ్॥
శ్రీమత్పయోనిధినికేతనచక్రపాణే
భోగీన్ద్రభోగమణిరఞ్జిత పుణ్యమూర్తే ।
యోగీశ శాశ్వత శరణ్య భవాబ్ధిపోత
లక్ష్మీనృసింహ మమ దేహి కరావలమ్బమ్ ॥ 1 ॥
శ్రీమంతమైన పాలసముద్రమునందు ఉండువాడా! చక్రపాణీ! యోగీశ్వరుడా! శాశ్వతుడా! శరణుపొందదగినవాడా! సంసారసముద్రము దాటించు నౌకయైనవాడా! ఓ లక్ష్మీనరసింహా! నాకు చేయూతనిమ్ము.
బ్రహ్మేన్ద్రరుద్రమరుదర్కకిరీటకోటి-
సఙ్ఘట్టితాఙ్ఘ్రికమలామలకాన్తికాన్త ।
లక్ష్మీలసత్కుచసరోరుహరాజహంస
లక్ష్మీనృసింహ మమ దేహి కరావలమ్బమ్ ॥ 2॥
బ్రహ్మ, ఇంద్రుడు, రుద్రుడు, మరుత్తులు, సూర్యుడు మొదలైన దేవతలు ప్రణమిల్లగా వారి కిరీటములు ఒరుసుకొనుచున్న పాదపద్మముల కాంతితో రమణీయమైనవాడా! లక్ష్మీదేవి యొక్క స్తనపద్మములందు విహరించు రాజహంసమా! ఓ లక్ష్మీనరసింహా! నాకు చేయూతనిమ్ము.
సంసారదావదహనాకరభీకరోరు-
జ్వాలావలీభిరతిదగ్ధతనూరుహస్య ।
త్వత్పాదపద్మసరసీరుహమాగతస్య
లక్ష్మీనృసింహ మమ దేహి కరావలమ్బమ్ ॥ 3 ॥
సంసారమనే దావాగ్నియొక్క భయంకర జ్వాలలచే దహించబడి నీ పాదపద్మములను ఆశ్రయించిన నాకు ఓ లక్ష్మీనరసింహా! చేయూతనిమ్ము.
సంసారజాలపతితస్య జగన్నివాస
సర్వేన్ద్రియార్థబడిశాగ్రఝషోపమస్య ।
ప్రోత్కమ్పితప్రచురతాలుకమస్తకస్య
లక్ష్మీనృసింహ మమ దేహి కరావలమ్బమ్ ॥ 4 ॥
సంసారమనే వలలో పడి , ఇంద్రియ సుఖములనే గాలమునకు చిక్కిన చేపవలే ఉన్న , దవడలు వణుకుచూ తలతిరుగుచున్న నాకు ఓ జగన్నివాసా! లక్ష్మీనరసింహా! చేయూతనిమ్ము.
సంసారకూపమతిఘోరమగాధమూలం
సమ్ప్రాప్య దుఃఖశతసర్పసమాకులస్య ।
దీనస్య దేవ కృపయా పదమాగతస్య
లక్ష్మీనృసింహ మమ దేహి కరావలమ్బమ్ ॥ 5 ॥
అతిఘోరమైన , అంతులేని లోతుగల సంసారకూపములో పడి , దుఃఖములనే వందలకొలది పాములచే చుట్టుముట్టబడి నీ పాదములు చేరిన దీనుడనైన నాకు ఓ దేవా! లక్ష్మీనరసింహా! కృపతో చేయూతనిమ్ము.
సంసారభీకరకరీన్ద్రకరాభిఘాత-
నిష్పీడ్యమానవపుషః సకలార్తినాశ ।
ప్రాణప్రయాణభవభీతిసమాకులస్య
లక్ష్మీనృసింహ మమ దేహి కరావలమ్బమ్ ॥ 6 ॥
సమస్త దుఃఖములనూ నసింపచేయు ఓ లక్ష్మీనరసింహా! సంసారమనే భయంకరమైన మదపుటేనుగు తొండము దెబ్బలచే నలిగిపోయిన , మరణభయముచే వ్యాకులచిత్తుడనైన నాకు చేయూతనిమ్ము.
సంసారసర్పవిషదిగ్ధమహోగ్రతీవ్ర-
దంష్ట్రాగ్రకోటిపరిదష్టవినష్టమూర్తేః ।
నాగారివాహన సుధాబ్ధినివాస శౌరే
లక్ష్మీనృసింహ మమ దేహి కరావలమ్బమ్ ॥ 7 ॥
సర్పములకు శత్రువైన గరుడుడు వాహనముగా కలవాడా! అమృతసాగరము నందు నివసించువాడా! లక్ష్మీనరసింహా! సంసారమనే సర్పము యొక్క మహోగ్రములైన , విషముతో నిండిన కోరలచే కరవబడి క్షీణించుచున్న నాకు చేయూతనిమ్ము.
సంసారవృక్షమఘబీజమనన్తకర్మ-
శాఖాయుతం కరణపత్రమనఙ్గపుష్పమ్ ।
ఆరుహ్య దుఃఖఫలితం చకితం దయాలో
లక్ష్మీనృసింహ మమ దేహి కరావలమ్బమ్ ॥ 8 ॥
పాపమే బీజముగా , అంతులేని కర్మలే కొమ్మలుగా, ఇంద్రియములే ఆకులుగా, కామములే పుష్పములుగా, దుఃఖములే ఫలములుగా కల సంసార వృక్షమునెక్కి బాధపడుచున్న నాకు దయామయుడవైన ఓ లక్ష్మీనరసింహా! చేయూతనిమ్ము.
సంసారసాగరవిశాలకరాలకాల-
నక్రగ్రహగ్రసితనిగ్రహవిగ్రహస్య ।
వ్యగ్రస్య రాగనిచయోర్మినిపీడితస్య
లక్ష్మీనృసింహ మమ దేహి కరావలమ్బమ్ ॥ 9 ॥
సంసారమనే సముద్రములోని భయంకరమైన పెద్దమొసళ్ళు నా నిగ్రహమును మింగగా కలత చెందినవాడను, మమకారమనే అలలచే పీడింపబడుచున్నవాడను అయిన నాకు ఓ లక్ష్మీనరసింహా! చేయూతనిమ్ము.
సంసారసాగరనిమజ్జనముహ్యమానం
దీనం విలోకయ విభో కరుణానిధే మామ్ ।
ప్రహ్లాదఖేదపరిహారపరావతార
లక్ష్మీనృసింహ మమ దేహి కరావలమ్బమ్ ॥ 10 ॥
ఓ ప్రభూ! కరుణానిధీ! సంసారసాగరములో మునిగి మూర్చిల్లిన దీనుడైన నన్ను చూడుము. ప్రహ్లాదుని దుఃఖమును తొలగించుటకు అవతారమెత్తిన ఓ లక్ష్మీనరసింహా! నాకు చేయూతనిమ్ము.
సంసారఘోరగహనే చరతో మురారే
మారోగ్రభీకరమృగప్రచురార్దితస్య ।
ఆర్తస్య మత్సరనిదాఘసుదుఃఖితస్య
లక్ష్మీనృసింహ మమ దేహి కరావలమ్బమ్ ॥ 11 ॥
సంసారమనే ఘోరమైన, దారి తెలియని అడవిలో సంచరించుచూ, కామములనే భయంకర మృగములచే పీడింపబడుచూ, మాత్సర్యమనే వడగాల్పు వలన తపించుచూ దుఃఖించు నాకు ఓ మురారీ! లక్ష్మీనరసింహా! చేయూతనిమ్ము.
బద్ధ్వా గలే యమభటా బహు తర్జయన్తః
కర్షన్తి యత్ర భవపాశశతైర్యుతం మామ్ ।
ఏకాకినం పరవశం చకితం దయాలో
లక్ష్మీనృసింహ మమ దేహి కరావలమ్బమ్ ॥ 12 ॥
సంసారబంధములలో చిక్కి, ఏకాకినై, పరాధీనుడనై, భయపడుచున్న నన్ను యమభటులు బెదిరించుచూ మెడకు తాడుకట్టి ఈడ్చుకుపోవునప్పుడు ఓ దయామయా! లక్ష్మీనరసింహా! నాకు చేయూతనిమ్ము.
లక్ష్మీపతే కమలనాభ సురేశ విష్ణో
యజ్ఞేశ యజ్ఞ మధుసూదన విశ్వరూప ।
బ్రహ్మణ్య కేశవ జనార్దన వాసుదేవ
లక్ష్మీనృసింహ మమ దేహి కరావలమ్బమ్ ॥ 13 ॥
ఓ లక్ష్మీపతీ! పద్మనాభా! దేవనాయకా! విష్ణుమూర్తీ! యజ్ఞరక్షకుడా! యజ్ఞస్వరూపుడా! మధుసూదనా! విశ్వరూపుడా! బ్రహ్మనిష్ఠుడా! కేశవా! జనార్దనా! వాసుదేవా! లక్ష్మీనరసింహా! నాకు చేయూతనిమ్ము.
ఏకేన చక్రమపరేణ కరేణ శఙ్ఖ-
మన్యేన సిన్ధుతనయామవలమ్బ్య తిష్ఠన్ ।
వామేతరేణ వరదాభయపద్మచిహ్నం
లక్ష్మీనృసింహ మమ దేహి కరావలమ్బమ్ ॥ 14॥
ఒక చేతితో చక్రమును, వేరొక చేతితో శంఖమును, మరొక చేతితో లక్ష్మీదేవిని పట్టుకుని, వరదం - అభయం - పద్మచిహ్నములు ధరించిన కుడి చేతితో లక్ష్మీనరసింహా! నాకు చేయూతనిమ్ము.
అన్ధస్య మే హృతవివేకమహాధనస్య
చోరైర్మహాబలిభిరిన్ద్రియనామధేయైః ।
మోహాన్ధకారకుహరే వినిపాతితస్య
లక్ష్మీనృసింహ మమ దేహి కరావలమ్బమ్ ॥ 15 ॥
తత్త్వమును తెలుసుకోలేని గుడ్డివాడనైన నాయొక్క వివేకమనే మహాధనమును ఇంద్రియములనే మహాబలవంతులైన దొంగలు అపహరించి , నన్ను అజ్ఞానమనే గాఢాంధకారములో పడత్రోసిరి. ఓ లక్ష్మీనరసింహా! నాకు చేయూతనిమ్ము.
ప్రహ్లాదనారదపరాశరపుణ్డరీక-
వ్యాసాదిభాగవతపుఙ్గవహృన్నివాస ।
భక్తానురక్తపరిపాలనపారిజాత
లక్ష్మీనృసింహ మమ దేహి కరావలమ్బమ్ ॥ 16 ॥
ప్రహ్లాదుడు - నారదుడు - పరాశరుడు - పుండరీకుడు - వ్యాసుడు మొదలైన భక్తశ్రేష్ఠుల హృదయాలలో నివసించువాడా! భక్తులను పాలించు కల్పవృక్షమా! ఓ లక్ష్మీనరసింహా! నాకు చేయూతనిమ్ము.
లక్ష్మీనృసింహచరణాబ్జమధువ్రతేన
స్తోత్రం కృతం శుభకరం భువి శఙ్కరేణ ।
యే తత్పఠన్తి మనుజా హరిభక్తియుక్తా-
స్తే యాన్తి తత్పదసరోజమఖణ్డరూపమ్ ॥ 17 ॥
లక్ష్మీనరసింహుని పాదపద్మములందలి మకరందమును ఆస్వాదించు తుమ్మెదవంటి వాడైన శంకరాచార్యునిచే శుభకరమైన ఈస్తోత్రము రచించబడినది. ఏమానవులు హరిభక్తులై ఆస్తోత్రమును పఠించెదరో వారు అఖండరూపమైన లక్ష్మీనరసింహుని పాదపద్మములను చేరెదరు.
॥ ఇతి శ్రీ శంకరాచార్య కృతం లక్ష్మీనృసింహకరావలమ్బస్తోత్రం సమ్పూర్ణమ్ ॥
