Showing posts with label ధర్మ విషయములు. Show all posts
Showing posts with label ధర్మ విషయములు. Show all posts

Saturday, 26 August 2017

పరమాచార్యుల అమృతవాణి : భక్తితో జన్మరాహిత్యం


పరమాచార్యుల అమృతవాణి :  భక్తితో జన్మరాహిత్యం
(జగద్గురుబోధల నుండి)

@శంకరవాణి,  #వేదధర్మశాస్త్రపరిపాలనసభ

''శివానందలహరి'' అని శంకరులు రచించిన గ్రంథం ఒకటి ఉన్నది, అందులో ''అంకోలం నిజబీజ సంతతిః'' అనే శ్లోకం ఒకటి ఉంది. దాని తాత్పర్యం ఇది - ఊడుగచెట్టు గింజలు రాత్రి రాలిపోతాయి. ఉదయమే అవి తిరిగి చెట్టును అంటుకొనిపోతాయి.

మానవుడు పగలల్లా సంసారం, వ్యాపారం చేస్తాడు, రాత్రి నిద్రపోతాడు, అట్లా కాకుండా రాత్రి సమయంలోనైనా, ఈశ్వరధ్యానము చేయాలి. అనగా ఊడుగుగింజ చెట్టుకు అంటుకొనునట్లు మనస్సు ఈశ్వరలగ్నం కావాలి. అందుకు సమయం కూడా అనుకూల పడాలి, అనడానికి ఈ ఉదాహరణ ఉపకరిస్తుంది.

ఆ శ్లోకంలో ఇంకొక ఉదాహరణ ''అయస్కాంతోపలం సూచికా'' అంటే - సూది సూదంటురాయిని అంటుకుంటుంది, అలాగే మనమనస్సు శివుని యందు అంటుకోవాలి.

పతివ్రత భర్తను అనుగమించినట్లు జన్మాంతరాల్లో కూడ అనుబంధం అలాగే వుంటుంది. ''సాధ్వీనైజ విభుం'' అన్నమాటకు తాత్పర్యము అది. అలాటి విడివడని అనుబంధం భక్తి ఈశ్వరునితో ఏర్పడాలి, 

''లతా క్షితిరుహం'' అని ఇంకొక ఉదాహరణ. చెట్టుతో లత పెనవేసుకొని ఉంటుంది. తీగను విడదీస్తే అది చచ్చిపోతుంది. చెట్టునుమాత్రం తీగ అల్లుకొన్న గుర్తులు అలాగే ఉంటాయి. చెట్టుతో ఎడబాటునకు తీగ వాడిపోయినట్లు భగవంతునితో దూరమైనపుడు మనం కూడా బాధపడాలి. తీగతో అనుబంధం పోయినందుకు చెట్టుకూడా దుఃఖపడుతోందా అన్నట్లు ఆ తీగ అల్లుకొన్న గుర్తులు స్పష్టపరుస్తున్నాయి, అలాగే భక్తునితో ఎడబాటునకు భగవంతుడు కూడా బాధపడుతూ ఉంటాడు.

''సింధు స్సరి ద్వల్లభం'' నది సముద్రుని గురించి పోయి లీనమౌతుంది.లీనమయినతరువాత ''నది'' అనే పేరే ఉండదు. ఇది ఐదవభక్తి, భక్తుడు భగవంతునితో సర్వాత్మనా లీనమయిపోవడం జన్మరాహిత్యం. సాయుజ్యం అంటే ఇదే. ఇట్లా ఐదు రకాల భక్తి భూమికలను శంకరులవారు ఈ శ్లోకంలో వివరించారు.

''కర్తవ్యో మమకారః'' అంటే నాది అనే మమకారం అవసరమే. మమకార మనేది ఎంతవరకు ఉంటే అంతవరకు కష్టాలే, అయినా ఈశ్వరునియందు ఈలాటిమమకారం ఉంచుకొంటే దుఃఖంలేదు. లోకంలో ''నాది'' అనేది త్యాగం చేయాలి. మనకు త్యాగం అలవాటులో లేదు. కాన మమకారాన్ని త్యాగం చేయకుండా అలవాటులో లేదు. అంటారా అపుడు ఈ మమకారాన్ని పరిమితంగా పుత్ర, మిత్ర, కళత్రాదులయందు ఏవో కొన్ని చోట్లనే ఉంచి, అవి మాత్రమే నాది. నాది అనుకొనక, అది విశ్వవ్యాప్తంచేసి, ప్రపంచమంతా నాదే అనుకోవాలి. అట్టి అవధిలేని మమకారంవల్ల సంతోషం వస్తుంది. అందరు ఈశ్వరుని బిడ్డలే, అంతా ఒక్కటే అని మమకారం పెట్టుకొంటే సరిపోతుంది.

అంగడికి వెడతాము. యజమాని ఒక్కడే వుంటాడు. రకరకాల గుడ్డలను గుమాస్తాలు చూపిస్తారు. విసుగు లేకుండా వర్ణిస్తారు. చివరకు ఒక్క గుడ్డ తీసుకొంటాము. బిల్లు ఇస్తారు. బిల్లు ఇచ్చినతర్వాత, ''అయ్యా వెళ్ళండి, ఇంకా కొనేవారు వస్తున్నారు. చోటు ఇవ్వండి.'' అని అంటారు. ఆ మాదిరి మానవుడు కూడా పనిఅయేదాకా, అంటే వేదవిహిత ధర్మం ఆచరించడం కోసం, సుఖలాభంకోసం, పుత్రమిత్రాదులయందు మమకారం ఉండవచ్చు. ఆపని అయాక ఆ మమకారాన్ని ఆ ఆదరాన్ని వదులుకోవాలి. మన తల్లీ, మన ఇల్లూ, మనకుక్క అని అనుకుంటే, కుక్క చచ్చినా దుఃఖపడతావు. కాన అంతా ఈశ్వరరూపము అనుకొని తాను సాక్షిగా ఉంటే క్రమముగా మనస్సు భగవంతునియందు లగ్నమై పోతుంది. బట్టలకొట్టు యజమానికి కొట్టునకు వచ్చిన జనుల మీద, ఎంతవరకు ఆదరము ఉందో, అంతవరకే సంసారం మీద మనం ఆదరం పెట్టుకొవాలి. క్రమంగా ఈశ్వరుడు, నేను ఒక్కటే అన్న ఐదవరకం భక్తి మనకు సిద్ధిస్తుంది.

Wednesday, 26 April 2017

శంకరచరితామృతము : 4 : బాల్యం - 1



పరమాచార్యుల అమృతవాణి : శంకరచరితామృతము : 4
బాల్యం - 1

@ శంకరవాణి

ఆచార్యులవారికి ఐదవయేట ఉపనయనం అయింది. ఉపనయనము 'కామ్యోపనయనము, నిత్యోపనయనము' అని రెండు రకాలు. ఏడవేట అనగా గర్భాష్టమమందు ఉపనయనం చేయాలి. బ్రహ్మతేజాన్ని అభ్యర్థించేవారు ఐదవయేటనే ఉపనయనం చేయాలి.

ఆచార్యులవారు మూడేండ్లువయసునాటికే దేశభాషలు నేర్చుకొన్నారు. ఐదేండ్లవయసు వచ్చేసరికి వారు సంస్కృత భాషను చక్కగా అభ్యసించేరు. ఉపనీతులైన తరువాత ఎనిమిదవ ఏడు వచ్చులోగా వేదశాస్త్రాలు అభ్యసించేరు. ఉపనీతులై వారు గురుకులవాసం చేసేరు. ఎనమిదవయేటికి ఇంటికి తిరిగి వచ్చేరు. అప్పటికి వారి తండ్రి దివంగతు లయ్యేరు. అపుడు ఆచార్యులవారు తాము కేవలం ఇంటిలో కూర్చుండుటకు కాక లోకాన్ని ఉద్ధరించుటకు వచ్చితిమని భావించేరు. ఈ లోకోద్ధరణకార్యాన్ని కొనసాగించడానికి సంన్యాసం స్వీకరించవలెనని వారు నిశ్చయించుకొన్నారు. అయితే వారి తల్లి తనకీయన ఒక్కడే కుమారుడు అయినందున వీరికి వివాహము చేయవలె నన్న ఆలోచనలో ఉన్నారు. అందుచే ఆచార్యులవారు తమ తల్లితో 'అమ్మా! నేను సంన్యాసము తీసికొంటాను, అని చెపితే ఆమెకు దుఃఖం కలుగుతుందని సంశయించసాగేరు.

ఆదిశంకరులు సన్యాసాశ్రమం స్వీకరించడానికి ముందు బ్రహ్మచర్యాశ్రమంలో భిక్షాన్నముతోడనే జీవించేవారు. ఆరోజులలో ఒక ద్వాదశినాడు వారు భిక్షాటనం చేస్తూ 'భవతి భిక్షాం దేహి!' అంటూ ఒక దరిద్రుని యింట అడుగు పెట్టేరు. ఆయన వారిని అనుగ్రహించాలన్న ఊహతోడనే అలా వారి యింటికి వెళ్ళేరు. ఆగృహస్థు పరమదరిద్రుడు. ఉంఛవృత్తితో కాలం గడుపుతూ ఉండేవాడు. ఆచార్యులవారు వెళ్ళిన వేళకు ఆబ్రాహ్మణుడు ఇంటిలో లేడు. ఆయన భార్య మాత్రం ఉన్నది. మహాతేజస్సంపన్నులైన ఆచార్యులవారిని చూడగానే ఈ తేజస్వికి భిక్షపెడితే మేలు కలుగుతుంది, అని ఆమె అనుకొన్నది. ఆచార్యులవారిని చూచీ చూడడంతోటే అందరకూ ఒక గౌరవభావం ఆయనపై ఏర్పడేది. ఆ బ్రాహ్మణుని భార్య భిక్షవేయడానికి ఇంటిలో ఏముంది? అని వెదుక సాగింది. ఇంటిలో ఏమీ లేదు. ద్వాదశిపారాణానికై ఆ బ్రాహ్మణుడు ఒక ఉసిరికాయను సంపాదించి ఉంచుకొన్నాడు. అది కూడా చెడిపోయింది. ఈ బ్రహ్మచారికి ఈ ఉసిరికాయ భిక్షగా ఎట్లు వేయను? అని ఆమె సంకోచిస్తోంది.

కాని ఆచార్యులవారు ఆమె భక్తిని గ్రహించి ఆ ఉసిరికను గ్రహించేరు. అపుడు వారి దారిద్య్రాన్ని పోగొట్టుమని లక్ష్మీదేవిని ఉద్దేశించి 'కనకధారాస్తవం' అనే ఒక స్తవాన్ని చదివేరు. వారికి ఐశ్వర్యం ప్రసాదింపుమంటూ లక్ష్మీదేవిని వేడుకొన్నారు.

అప్పుడొక ఆశరీరవాణి-'వీరు చేసిన పాపం చాలా ఉంది; చాలాకాలం వీరు దరిద్రులుగా బాధపడాలి, అలా కాకుంటే వీరి పాపం తొలగదు' అని వినిపించింది.

అంతట ఆచార్యులవారు - 'వీరీవిధంగా పరమప్రీతితో భిక్షం పెట్టినారుకదా! దీనివలన సంపాదితమైన పుణ్యం ఎంత అధికమైన పాపాన్ని అయినా పరిహరింపజాలి ఉంటుంది'- అన్నారు. వెంటనే ఆ దరిద్రబ్రాహ్మణుని యిల్లు సకల సంపదలకు ఆలవాలమై ఐశ్వర్యంతో నిండింది. ఇది ఆచార్యులవారు బ్రహ్మచర్యాశ్రమంలో ఉండగా జరిగిన విషయం.

http://jagadguru-vaibhavam.blogspot.in/2017/04/4-1.html

వైశాఖమాస మహాత్మ్యము : దానముల విశిష్టత - 2




 వైశాఖమాస మహాత్మ్యము : దానముల విశిష్టత - 2

వైశాఖమాసమునందు సద్బ్రాహ్మణునకు శయ్యాదానమును ఇచ్చినచో దానమిచ్చినమనుజుడు స్వర్గనివాసియగును .

శరీరారోగ్యమునకుసౌఖ్యాలు ముఖ్యకారణములు కాబట్టి ఆకలిగొన్నవానికి భోజనమిడి, మెత్తని శయ్యనమర్చి విసనకఱ్ఱ చేతికిచ్చినచో అట్టి మానవునకు జరామరణములు కలుగవు.

బ్రాహ్మణ శ్రేష్ఠునకు శయ్యతోపాటు తలగడదిండు కూడా దానం చేయవలెను.

శయ్యనిదానమివ్వలేనివారు చాపనైనా దానమియ్యవలెను, దీనివలన అకాలమృత్యుభయం తొలగిపోవును.

బ్రాహ్మణునకు పలుచనివస్త్రదానముకూడ అతిప్రధానమైనది, అటుల వస్త్రదానం చేసినచో దీర్ఘాయువు కలవాడగును.

పోకచెక్కలుగాని, సుగంధద్రవ్యములుగాని , కొబ్బరికాయ లేక అరటిపండ్లుగాని దానంచేసిన యెడల  ఏడుజన్మలవరకు బ్రాహ్మణుడుగ జన్మించుటయేగాక వేదశాస్త్రపారంగతుడై రాణించును.

వైశాఖమాసము  ప్రారంభముకాగానే మల్లెపూలతో చేసినదండగాని , మొగలి లేక బొగడప్వ్వులతో నిర్మించిన దండనుగానీ విప్రుని మెడలోవేసినగాని చేతిమణికట్టుకు కట్టినచో విష్ణుమూర్తి తనను పూజించునటులే భావించి, అతనికి సర్వసంపదలు సమకూర్చును.

వైశాఖమాసంలో చల్లనినీడ నిచ్చునటువంటి చలివేంద్రములు కట్టుట రాజమార్గమునకిరుప్రక్కల చెట్లనునాటుట ,  జలములేనిచోట్ల తటాకములు త్రవ్వించుట, బావులు త్రవ్వించుట మొదలగు ధర్మకార్యములను ఏమానవుడుచేయునో అట్టి వానికి సంతానము లేనియడల సత్పుత్ర సంతానము, ఐశ్వర్యములేని యెడల అష్టైశ్వర్యములు కలుగును.

వైశాఖమాసములో సూర్యుడు మేషరాశిలో యుండగా విప్రోత్తమునకు తమలపాకులు, పోకచెక్కలు, కర్పూరము, సుగంధద్రవ్యములు దానమిచ్చినయెడల తనకు, తనవంశీయులకూ శరీరారోగ్యము కలుగును. దప్పికతోనున్న బ్రాహ్మణునకు పెరుగుగాని, ఉప్పునిమ్మరసం కలిపిన మజ్జిగకాని సంతోషముగానివ్వవలెను. ఇది సకలపాపహరము, పూర్ణాయుర్దాయకరము, జన్మాంతమున విష్ణులోకప్రాప్తికి హేతువు,

తాపోపశమనమునకై విప్రునకు పండు, పానకము, బెల్లముకలిపిన దోసపండు, చెరకుముక్కలు, చక్కెరకలిపిన మామిడిపండ్లరసం, వడపప్పు, పనసతొనలు దానమిచ్చినవాడు తన పాపములనుండి విముక్తుడై గొప్ప పుణ్యశీలుడై చక్రవర్తివలె భోగముననుభవించును.

Tuesday, 25 April 2017

వైశాఖమాస మహాత్మ్యము : దానముల విశిష్టత


వైశాఖమాస మహాత్మ్యము : దానముల విశిష్టత

వైశాఖమాసములో జలదానము మిక్కిలి శ్రేష్ఠమైనది. అందువలన వైశాఖమాసమునందు చలివేంద్రములు కట్టించి ,దాహముగొన్నవారికి దాహము తీర్చిన యెడల సమస్తపాపములూ నశించును.

దప్పిక తీర్చుటకు జలంగానీ , ఎండకు గొడుగునుగానీ , పాదములకు పాదరక్షలుగానీ , శరీరతాపం తగ్గుటకు విసనకర్రనుగానీ దానమిచ్చినచో అట్టివారికి సమస్తపాపములూ నశించును.

వైశాఖమాసము ఆరంభము కాగానే ఒక బీదబ్రాహ్మణునకు కలశమునిండా జలంపోసి దానంచేసి నమస్కరించినయెడల అన్ని దానములకన్నా ఈ దానం వలన మిక్కిలి ఫలము పొందినవాడగును.

ఈ మాసములో ఒక బ్రాహ్మణునకు గొడుగును దానము చేసినచో విష్ణుమూర్తి సంతసించి సకలైశ్వర్యములూ ఇచ్చును.

కాలిజోళ్ళు ఎవరు దానమిచ్చెదరో అట్టి పుణ్యాత్ముడు తన అవసానకాలమున యమకింకరులు తనను తీసుకుని పోవుటకు వచ్చినపుడు ఆ యమకింకరులను నిర్భయంగా తరిమికొట్టి విష్ణుసాయుజ్యమును పొందవచ్చును.

ఉత్తమ బ్రాహ్మణునకు జలపాత్ర , విసనకర్ర , గొడుగు , కాలిజోళ్ళు దానమివ్వవలెను.

అన్ని దానములకంటే అన్నదానము గొప్పది. ఎండలో అలసి వచ్చిన విప్రునకు తనశక్తికొలదీ స్వల్పమైననూ భోజనము పెట్టినచో కోటిదానములు చేసిన పుణ్యఫలం కలుగును.

వైశాఖమాస మహాత్మ్యము : ఆరంభము



వైశాఖమాస మహాత్మ్యము : ఆరంభము

వైశాఖమాసమునందు చేసిన దానధర్మములు, యజ్ఞయాగములు, స్నానజపములు మొదలగు కర్మలన్నియు మానవుని సమస్తపాపములను నశింపజేయును.

ఈ మాసము గొప్ప తపోమహిమ కలిగి ఉన్నది.

వైశాఖమాసములో సూర్యుడు ఉదయించు వేళకుముందు మేషసంక్రమణ కాలములో ఏ మానవుడు స్నానము చేసి శ్రీమన్నారాయణుని పూజించునో అట్టి మానవునియెడ శ్రీహరి పరిపూర్ణ కటాక్షము కలవాడు అగును.

శ్రీమన్నారాయణుని  ఆజ్ఞను అనుసరించి దేవతలు  వైశాఖమాసములో సూర్యోదయము అయిన ఆరుఘడియల వరకు మానవులమేలు కొరకు బహిర్జలముయందు సన్నిహితులై ఉందురు.

స్నానముచేయుటకు నది అందుబాటులో లేనుయెడల, తటాకమువద్దగానీ, బావివద్దగానీ స్నానము చేయవచ్చును. 

చైత్ర బహుళ అమావాస్యనాడు పానకముతో నింపిన కలశమును, మల్లెపూలనూ, సుగంధద్రవ్యములనూ బ్రాహ్మణునకు దానమిచ్చినయెడల తీర్థస్థలములలో వంద మార్లు పితృదేవతలకు శ్రాద్ధకర్మలు చేసినంత ఫలితమును పొందగలరు.


 

Saturday, 11 June 2016

సంగ్రహ ధర్మ విషయములు - నిత్యకర్మలు

నిత్యకర్మలు
నవావశ్యక కర్మాణి కార్యాణి ప్రతివాసరమ్|
స్నానం సంధ్యా జపో హోమో స్వాధ్యాయో దేవతార్చనమ్|
వైశ్వదేవం తథాతిథ్యం నవమం నిత్య తర్పణమ్||

 
స్నానం , సంధ్యావందనం , జపం , హోమం , బ్రహ్మయజ్ఞం , దేవతార్చనం , వైశ్వదేవం , ఆతిథ్యం , పితృతర్పణం అనే 9 కర్మలూ ప్రతిరోజూ తప్పక చేయాలి.

శ్రీ జయేంద్రవాణి - ప్రశ్నోత్తరములు 7

1 పాఠశాలకు వెళ్ళే విద్యార్థులు సాయంత్రం సంధ్యావందనం చేయుటకు ముందు స్నానం చేయటం అవసరమా?
జ:  స్నానం చేయనవసరము లేదు. శుభ్రమైన వేరే బట్టలు కట్టుకుని సంధ్యావందనం చేయవచ్చును.

2  పరిషేచనం చేసిన తరువాత మధ్యలో లేవవచ్చునా? అందుకు ఏదైనా పరిహారం ఉన్నదా?
జ:  అలా లేవకూడదు. పరిహారం ఉండదు. ఆవిధంగా మధ్యలో లేస్తే ఆ ఆకు వదిలివేసి వేరే ఆకులో భోజనము చేయవలెను.

3 సంధ్యావందనమే కాకుండా మధ్యాహ్నికము కూడా చెయ్యవలెనా?
జ:  అవశ్యం చేయవలెను.

4 నిర్ణీత కాలములో సంధ్యావందనం చేయువారు ప్రాయశ్చిత్త అర్ఘ్యము ఇవ్వవలెనా?
జ: నియమంగా సంధ్యావందనం చేయువారు ప్రాయశ్చిత్త అర్ఘ్యము ఈయనవసరము లేదు. ఆచమనము, ప్రాణాయామము చేసి మొదట ప్రణవ వ్యాహృతి , తరువాత గాయత్రి , ఆతరువాత ప్రణవ వ్యాహృతి జపించవలెను.

5 సాయంత్రం అర్ఘ్యప్రదానం భూమి మీద చేయవలెనా? జలములో చేయవలెనా?
జ:  రెండూ చేయవచ్చును. నేలమీద కూర్చుంటే నేలమీద , నీటిలో నిలబడి ఉంటే నీటిలోనూ అర్ఘ్యప్రదానం చేయవలెను.

శ్రీ జయేంద్రవాణి - ప్రశ్నోత్తరములు 6


 
 శ్రీ జయేంద్రవాణి: ప్రశ్నోత్తరములు : 6

1. తులసిపూజ చేయు విధానమును తెలియగోరుచున్నాను?
జ: తులసి మొక్కలో ముందు నీరు పోయవలెను. తరువాత కుంకుమ పెట్టి పుష్పము సమర్పించవలెను. తరువాత పాలు , పళ్ళు నైవేద్యము పెట్టి కర్పూరము వెలిగించి హారతి ఇవ్వవలెను. పిమ్మట మూడుసార్లు ప్రదక్షిణం చేసి నమస్కరించవలెను.తులసి మన్నును ప్రసాదముగా నుదుట పెట్టుకొనవలెను. " తులసి పూజా విధానం" అనే పుస్తకం దొరుకుతుంది.

2. కొన్ని రోజులలో తులసి కోయకూడదు అంటారు. ఏ ఏ రోజులలో కోయకూడదు ? శ్రాద్ధము ఆరోజువస్తే కోయవచ్చునా ?
జ: శుక్రవారము, ఆదివారము, ఏకాదశి, అమావాస్య, పౌర్ణమి వంటిరోజులలో తులసి కోయకూడదు అన్నది సాధారణ నియతి. శ్రాద్ధము ఏరోజు వచ్చినా తులసి కోయవచ్చును.

3. తులసిపూజను పురుషులు చేయవచ్చునా ?
జ: బాగా చేయవచ్చును.

4. పూజగదిలో సుద్దతో ముగ్గులు వేయవచ్చునా ?
జ: ఇంట్లో, ఇతరగదులలో సుద్దతో ముగ్గులు పెట్టవచ్చును. కానీ పూజగదిలో మాత్రం బియ్యపు పిండితో మాత్రమే ముగ్గు వేయవలెను.

5. బియ్యపుపిండితో ముగ్గు వేయటంలో ఏమైనా అంతరార్థం నిండి ఉన్నదా ?
జ : బియ్యపుపిండి తో ముగ్గు పెట్టిన ఇంట్లో శుభం జరుగుతుంది. ముగ్గు మంగళ చిహ్నం.

Friday, 10 June 2016

పరమాచార్యుల అమృతవాణి : శాంతము



పరమాచార్యుల అమృతవాణి : శాంతము
(జగద్గురుబోధలనుండి)

లోకంలో ఉన్న ఏ ఆనందమయినా అందమయినా కామమయినా ఇట్టివన్నీ మన ఆత్మలోనే ఉన్నాయి. లోపల వెలసి వెలిగే అఖండాకార పరిపూర్ణ ఆనందచ్ఛాయలే బయటగోచరించే అందం. బయట ఒక్కటీలేదు, ఉన్నదంతా లోపల. గీతలో ఈ తత్త్వము ననుసరించే ఒక శ్లోకం ఉన్నది.

అపూర్యమాణ మచల ప్రతిష్ఠం సముద్ర మావః ప్రవిశన్తి యద్వత్‌,
తద్వత్కామా యం ప్రవిశన్తి సర్వే స శాంతి మాప్నోతి న కామకామీ.


కామ మనేది వెలుపలి ఆశ. మనకు వెలుపలి వస్తువుల చేతనే సంతోషంగాని ఆనందంగాని కలుగుతుంది. వెలుపలి కామము కావాలని అనుకొనే వాడెన్నటికిని శాంతి పొందడు. ఎపుడూ వెలుపలి వస్తు సంచయం కోరుకొనే వానికి శాంతి ఎక్కడ? వెలుపల ఎన్నో వస్తువులు ఉన్నవి. అవివస్తే రానీ పోతే పోనీ, అని అన్నీ లోపలి వస్తువుతో కలియ వలసినవే. ప్రతి నిమిషమూ వేలాది నదులు వచ్చి పడుతున్నవి సముద్రంలో. ఒకపు డెపుడో అవన్నీ సముద్రంలోనుంచి బయటికి వెళ్ళినవేకదా! చూడబడే వస్తువులన్నీ లోపల ఉన్న ఆనందపు శాఖలే కదా! 'అది కావాలి ఇది కావాలి' అని సబ్బండు కోరికలతో మనము వస్తువులను తరుము కొంటూపోతే ఏమి ఫలం? అన్నీ లోపలనే ఉన్నవి. అని తలస్తే- 'స శాంతి మాప్నోతి' అతడు శాంతిని పొందుతాడు. ఏదో పెద్ద పదవో ఒక స్త్రీయో ఒక సంపదో ఒక గౌరవమో ఒక స్తోత్రమో ఇవి ఇట్టివి, సంప్రాప్తమైతేనే మన కానందం, సంతోషం, లేకపోతే దుఃఖం, లేక కొరత అని తలపోయడం శుద్ధ తెలివితక్కువ. వెలుపలి వస్తువుల వల్ల కలిగే ఆనందం లోన వుబికే ఆనందం యొక్క బిందువే.

'యత్సౌఖ్యాంబుధి లేశలేశత ఇమే శక్రాదయోనిర్వృతాః'

లోపల వెలసిన ఆనందపరమాత్మస్వరూపంయొక్క సౌఖ్య లేశమే ఇంద్రాదుల ఆనందమూ సంతోషమూ. వెలుపలి విషయములవల్ల కలిగే ఆనందం లోపలికి వెళ్ళి లయం కావలసినదే. అంతర్ముఖానందంతో ఓలలాడేవానికి-ఈశ్వరుని సాక్షాత్కారం కలవానికి వెలుపలి వస్తువులవల్ల కోరదగిన ఆనందంగాని సంతోషంగాని ఉండదు. అవి లేకపోతే అతనికి దుఃఖం ఏర్పడదు.

అలాకాక బహిర్ముఖంగా ఆనందం వెతకికొనేవాడు ఆనందం కలిగించే వస్తువులను పొంది సంతోషిస్తాడు. వియోగంచే దుఃఖిస్తాడు. అవిలేకపోతే ఏదో కొంత కలిగి నటులు క్షోభిస్తాడు. ఆయా వస్తువుల వెనువెంట అంటుకొని ఉంటాడు. అయ్యో చేతికందకపోయెనే అని చింతిల్లుతాడు. 'ఈ దుఃఖం ఎవరివల్ల కలిగింది?' అని తెలిసికొని అతనిపై దండెత్తుతాడు. కోపపడతాడు. గోలగోల చేసిపెడతాడు. ఇవీ వానిచర్యలు. వానికి శాంతి అనే మాట ఉండదు- 'స శాంతి మాప్నోతి న కామకామీ'. ఆతని కేనాటికీ శాంతి ఉండదు. వెలుపలి విషయాలు వస్తయ్‌, పోతయ్‌, వీనిని ఎవడయినా తన సుఖానికి ఆధారం గనుక చేసికొంటే అలవానికి ఏనాటికీ ఎడతెగని కొరతే. వానికి శాంతి సున్న. అని గీతలో భగవంతుడు ఒక అధ్యాయం చివర శ్లోకంలో చెప్పి ముగిస్తాడు.

వెలుపలి కామ్యాలు లెక్కలేనన్ని. వస్తే రానీ? నదులు సముద్రంలో ఎపుడూ వచ్చి పడుతున్నయ్‌. అపారమయిన సముద్రజలాలలో చేరిపోతున్నయ్‌. నదులు వచ్చి కలియకపోతే సముద్రాని కేమయినా దుఃఖమా కొరతా? దాని స్థితి ఎట్టిది?

అపూర్యమాణ మచల ప్రతిష్ఠం సముద్ర మాపః ప్రవిశన్తి యద్వద్‌.

ఆపూర్వమాణ మంటే అంతటా నిండినది. అచల ప్రతిష్ఠర్సకదలక మెదలక ఉండేది. అది రాలేదే, ఇది రాలేదే, ఇంకా నీరు చాలదే అని సముద్రం దుఃఖించదు. కొంచెమయినా చలనం లేనిది సముద్రం. 'అచలప్రతిష్ఠమ్‌'

రామేశ్వరం దగ్గర ఉండే సముద్రం 'రత్నాకరం, మహోదధి' అని రెండు భాగములుగా చెపుతారు. రత్నాకరంలో ఆరునెలలు అలలు లేస్తూవుంటయ్‌. మహోదధిలో దేవీపట్నం వంకకు వెళ్లిచూస్తే ఒక పెద్దకొలను మాదిరిగా అలలేమీ లేకుండా ఉంటుంది. అట్లే మనంకూడా వెలుపలి నుండి వచ్చే విషయాలవల్ల పుట్టే ఆనందనదులను ఆత్మానంద మహోదధి లోనికి ఇముడ్చికొని 'ఆ పూర్యమాణ మచల ప్రతిష్ఠము'గా కూచోవాలి. 'అట్లా ఉంటేనే శాంతి' అని గీతాశ్లోకం చెబుతూంది.

సర్వవ్యాపకమయిన ఒక ఆనందస్వరూపమే లోపల కూడా నిండి నిబిడమై ఉంది. వెలుపలి వస్తువులన్నీ లోపలి వస్తువులో ఐక్యం కావలసినవే 'అదిలేదు ఇది లేదు'. అన్న కొరతలతో మనం బాధపడవలసిన అవసరంలేదు. 'నాకు ఈ వస్తువు కావాలి' అంటే అది ఒక కొరతకు గుర్తు. నిండిన వస్తువు లోపలఉన్నప్పుడు వెలుపలివస్తువలకెక్కడి ఆవశ్యకత? 'వచ్చేది రానీ పోయేది పోనీ,' అని ఆ అఖండాకార పరమానంద వస్తు సాక్షాత్కారం కావలసిందే. లోపల వస్తులేశమే వెలుపలి విషయవిస్తారం అన్న జ్ఞానం ఉండాలి. సముద్రంలాగా అచలంగా ఉండాలి. అట్టివాడే - 'స శాంతి మాప్నోతి' శాంతి పొందుతాడు. అని అర్జునునికి భగవంతు డుపదేశించి-'అర్జునా! నీకు ఏకొరతా అక్కరలేదు. నీవు క్షత్రియుడవు' యుద్ధం చేయుట నీ ధర్మం 'నాధర్మం నేను చేస్తున్నాను' అనే మెలకువతో యుద్ధంచెయ్‌, కొరతలనే వానిని దాపులకు రానీయకు! 'వానికి కష్టం కలుగుతుందే, వీనికి కష్టం కలుగుతుందే' అనే ఉబుసు నీకు వద్దు, నీధర్మమేదో నీవు చేసి ముగించు' అని ఉపదేశపూర్తి చేశాడు.

శ్రీజయేంద్రవాణి - ప్రశ్నోత్తరములు 5

1  జపము చెయ్యటానికి తగిన మాలలు ఏవి?
జ: రుద్రాక్షమాల , ముత్యాలమాల , పగడాలమాల , స్ఫటికమాల , శంఖుపూసలమాల , వెండిపూసలమాల , వేపగింజలమాల , తామరపూసలమాల.

2  నిమ్మకాయ డిప్పలో దీపం వెలిగించవచ్చునా?
జ: దుర్గా అమ్మవారి సన్నిధిలో రాహుకాలం ముందు వెలిగిస్తే మేలు జరుగును.


3  ఇంట్లో పావురములను పెంచవచ్చునా?
జ: ఇంట్లో పావురములను పెంచకూడదు. కాని దేవాలయములలోను , ఇతర బహిరంగ స్థలములలోనూ ఉన్న పెంపుడు పావురములకు ధాన్యపు గింజలు ఆహారముగా వేయవచ్చును.

4  పూజకు సంబంధించిన స్తోత్రములనన్నింటినీ పూజగదిలో కూర్చునే చదవవలెనా? లేక ఇంట్లో ఇతర గదులలో కూర్చుని కూడా చదువవచ్చునా?
జ: దేవుని ప్రార్థనా స్తోత్రములను ఇంట్లో శుభ్రముగా వున్న అన్ని గదులలోను కూర్చుని చదవవచ్చును.అన్ని సమయాలలోనూ చదవవచ్చును.

5  ఇంట్లో దేవుని గదిలో ఉదయం , సాయంత్రం రెండు వేళలా దీపం వెలిగించి ప్రార్థించవలెనా? సాయంత్రం మాత్రం దీపం వెలిగించిన సరిపోతుందా?
జ: గృహయజమానురాలు రెండువేళలా దీపం వెలిగించి పూజ చేయవలెను.

Monday, 23 May 2016

సంగ్రహ ధర్మ విషయములు - దంతధావనం

సంగ్రహ ధర్మ విషయములు
దంతధావనం

ఉదితే భాస్కరే యశ్చ కరోతి దంతధావనమ్|
సవితా భక్షిత స్తేన పితృవంశస్య ఘాతకః||

సూర్యుడు ఉదయించకముందే పళ్ళు తోముకోవాలి. ముందుగా బాగా పుక్కిలించి ఉమ్మి వేయాలి.

ప్రాఙ్ముఖోదఙ్ముఖో వాపి ద్వి రాచమ్య తతఃపరమ్|
ఉక్తకాష్ఠేన కుర్వీత వాగ్యతో దంతధావనమ్||

తూర్పు లేదా ఉత్తరం వైపు తిరిగి కూర్చుని రెండుసార్లు ఆచమనం చేసి ,మౌనంగా దంతధావనం చేసుకోవాలి.

బాహూ జాన్వంతరం కృత్వా కుక్కుటాసన సంస్థితః|
తర్పణాచమనోల్లేఖ్య దంతధావన మాచరేత్||

గొంతుకకు కూర్చుని చేతులురెండూ మోకాళ్ళమధ్యలో ఉంచుకుని {దీనినే కుక్కుటాసనం అంటారు.} ఆచమనం చేసి, అలాగే దంతధావనం చేసుకోవాలి.

ప్రక్షాళ్య హస్తౌ పాదౌ చ ముఖం సుసమాహితః |
దక్షిణం బాహు ముద్ధృత్య కృత్వా జాన్వంతరా తతః||

చేతులు, కాళ్ళు , ముఖము శ్రద్ధగా కడుక్కోవాలి. కూర్చుని, రెండు మోకాళ్ల మధ్య నుంచి కుడి చేతితోపళ్ళు తోముకోవాలి.

మూత్రే రేతసి విట్సర్గే దంతధావన కర్మణి|
భక్ష్యాణాం భక్ష్యణే చైవ క్రమా ద్గండూష మాచరేత్||

మల విసర్జన తరువాత 8 సార్లు , మూత్ర విసర్జన తరువాత4 సార్లు , పళ్ళు తోముకునేటప్పుడు , అన్నం మొదలైనవి తిన్న తరువాత 12సార్లు పుక్కిలించాలి .

పురత  స్సర్వదేవా శ్చ దక్షిణే పితర స్తథా|
ఋషయః పృష్ఠత స్సర్వే వామే గండూష ముత్సృజేత్||

తనకు ఎదుట దేవతలు , కుడి ప్రక్కన పితృ దేవతలు , వెనుక ఋషులు ఉంటారు . కాబట్టి పుక్కిలించిన నీళ్ళువగైరా ఎడమ వైపు  ఉమ్మి వేయాలి.

గండూష స్యాథ సమయే తర్జన్యా వక్త్రచాలనమ్|
కరోతి యది మూఢాత్మా రౌరవం నరకం వ్రజేత్||

పుక్కిలించేటప్పుడు{దంతధావనం వగైర సందర్భాలలోనూ}పళ్ళుతోమటం వంటి పనులు చూపుడు వేలితో చేయగూడదు .

ప్రభాతే మైథునే చైవ ప్రస్రావే దంతధావనే|
స్నానేచ భోజనే కాలే మౌనం షట్సు విధీయతే||

సూర్యోదయ సమయములోనూ, మల మూత్రవిసర్జనం సమయములోను, పళ్ళు తోముకొనేటప్పుడు, స్నానం చేసేటప్పుడు, భోజనం చేసేటప్పుడు మౌనంగా ఉండాలి.

దూరా దవసధా న్మూత్రం పురీషం చ  సమాచరేత్|
గచ్ఛం స్తిష్ఠం చ విష్ఠాం చ మలమూత్రం చ నోత్సృజేత్||

మలమూత్ర విసర్జన ఇంటికి దూరంగా చేయాలి . నడూస్తూ గాని , నిలుచుండి గాని మలమూత్ర విసర్జన చేయగూడదు.

పవిత్రం చ దక్షిణే కర్ణే కృత్వా విణ్మూత్ర ముత్సృజేత్|
మలమూత్రవిసర్జన  సమయంలో యజ్ఞోపవీతాన్ని కుడిచెవికి తగిలించుకోవాలి.

Sunday, 22 May 2016

సంగ్రహ ధర్మ విషయములు - నిద్రలేవటం


సంగ్రహ ధర్మ విషయములు

      నిద్రలేవటం

బ్రాహ్మే ముహూర్తే ఉత్థాయ చింతయే దాత్మనో హితమ్|
స్మరణం వాసుదేవస్య కుర్యాత్ కలిమలాపహమ్||

సూర్యుడు ఉదయించడానికి 2 ముహూర్తాలు అంటే సుమారుగా తెల్లవారుజామున 4:30 నుండి 5:00 గంటల నడుమ నిద్ర లేవాలి . నిద్ర లేచిన తర్వాత వాసుదేవుని అంటే తనకు ఇష్టం అయిన దేవుడిని తలచుకోవాలి.

హరే రామ హరే రామ రామ రామ హరే హరే|
హరే కృష్ణ హరే కృష్ణ కృష్ణ కృష్ణ హరే హరే||


విశ్వేశం కేశవం ధుంఢిం దండపాణిం చ భైరవమ్|
వందే కాశీం గుహాం గంగాం భవానీం మణికర్ణికామ్||

ఇలా ఇష్టమైన దైవానికి సంబంధించిన ప్రార్థన చేసుకోవాలి . దైవస్మరణం తరువాత మెల్లగా కళ్ళు తెరిచి కుడి అరచేయిని కింది నుంచి పైకి చూస్తూ

కరాగ్రే వసతే లక్ష్మీః కరమధ్యే సరస్వతీ |
కరమూలే తు గౌరీ చ ప్రభాతే కరదర్శనమ్||

అరచేయి కిందివైపు చివర లక్ష్మిని , మధ్యలో సరస్వతిని , మొదట్లో గౌరిని స్మరించాలి . తరువాత శుభాశుభాలు ఏవి చూసినా ఇబ్బంది ఉండదు.

ఆ తరువాత-
  సముద్రవసనే దేవి పర్వతస్తనమండలే |
విష్ణుపత్ని నమస్తుభ్యం పాదస్పర్శం క్షమస్వమే||

అంటూ భూమిని ప్రార్థిస్తూ , నమస్కరించి తరువాత కాలు నేలపై మోపాలి.

ఈ బ్లాగు https://shankaravani.org/ కు ఇప్పుడు మార్చబడినది

ఈ బ్లాగు https://shankaravani.org/ కు ఇప్పుడు మార్చబడినది. సజ్జనులందరూ మా క్రొత్త వెబ్సైట్ను ఆదరిస్తారని ఆశిస్తున్నాము.