శంకరస్త్రోత్రాలు : గౌరీదశకమ్

 

గౌరీదశకం

 లీలాలబ్ధస్థాపితలుప్తాఖిలలోకాం
లోకాతీతైర్యోగిభిరంతశ్చిరమృగ్యామ్
బాలాదిత్యశ్రేణిసమానద్యుతిపుంజాం
గౌరీమంబామంబురుహాక్షీమహమీడే ||1||

తన లీలచే సమస్తలోకములనూ సృష్టించి కాపాడి నశింపచేయునదీ,లోకాతీతులైన యోగులచే చిరకాలముగా వెతకబడుచున్నదీ,బాలసూర్యసమూహము వంటి కాంతి మండలముకలదీ,పద్మములవంటి కన్నులుకలదీ అగు జగదమ్బయైన గౌరీదేవిని నేను స్తుతించుచున్నాను.

ప్రత్యాహారధ్యానసమాధిస్థితిభాజాం
నిత్యం చిత్తే నిర్వృతికాష్ఠాం కలయంతీమ్
సత్యజ్ఞానానందమయీం తాం తనురూపాం
గౌరీమంబామంబురుహాక్షీమహమీడే ||2||

ప్రత్యాహారము - ధ్యానము - సమాధి అనుయోగములనాచరించు యోగుల మనస్సునందు ఎల్లప్పుడూ సంతోషమును కలిగించునదీ,సత్యము - జ్ఞానము - ఆనందములు స్వరూపముగా కలదీ,సూక్ష్మరూపమున్నదీ,పద్మముల వంటి కన్నులు కలదీ అగు జగదంబ అయిన గౌరీదేవిని నేను స్తుతించుచున్నాను.

చంద్రాపీడానందితమందస్మితవక్త్రాం
చంద్రాపీడాలంకృతనీలాలకశోభామ్ |
ఇంద్రోపేంద్రాద్యర్చితపాదాంబుజయుగ్మాం
గౌరీమంబామంబురుహాక్షీమహమీడే || 3 ||

చంద్రచూడుడగు శివునిచే ఆనందింపచేయబడిన చిరునవ్వు ముఖము కలదీ,తన నల్లని కురులలో చంద్రుని అలంకరించుకున్నదీ,ఇంద్రుడు - విష్ణువు మొదలగు దేవతలచే పూజింపబడు పాదపద్మములు కలదీ,పద్మముల వంటి కన్నులు కలదీ  అగు గౌరీదేవిని నేను స్తుతించుచున్నాను.

ఆదిక్షాంతామక్షరమూర్త్యా విలసంతీం
భూతే భూతే భూతకదంబప్రసవిత్రీమ్ |
శబ్దబ్రహ్మానందమయీం తాం తటిదాభాం
గౌరీమంబామంబురుహాక్షీమహమీడే || 4 ||

’అ’ కారము మొదలు ’ క్ష’ కారము వరకూ ఉన్న అక్షరములు తన స్వరూపముగా విలసిల్లుచున్నదీ,పంచమహాభూతములలో (భూమి - నీరు - గాలి - అగ్ని - ఆకాశము ) ప్రతీదానియందూ అనేక ప్రాణులను సృష్టించునదీ, శబ్దబ్రహ్మస్వరూపిణియైనదీ, ఆనందముతో నిండినదీ , మెరుపువలె ప్రకాశించునదీ,పద్మములవంటి కన్నులు కలదీ అగు జగదంబ అయిన గౌరీదేవిని నేను స్తుతించుచున్నాను.

మూలాధారాదుత్థితవీథ్యా విధిరంధ్రం
సౌరం చాంద్రం వ్యాప్య విహారజ్వలితాంగీమ్ |
యేయం సూక్ష్మాత్సూక్ష్మతనుస్తాం సుఖరూపాం
గౌరీమంబామంబురుహాక్షీమహమీడే || 5 ||

సుషుమ్నానాడీ మార్గము ద్వారా మూలాధారచక్రము నుండీ బ్రహ్మరంధ్రము వరకూ సుర్య, చన్ద్ర స్ఠానములైన ’ఇడా’ ’పింగళా’ నాడుల యందు విహరించు తేజోమూర్తియైనదీ,సూక్ష్మమైన పదార్ధము కంటే సూక్ష్మమైనదీ, సుఖస్వరూపిణియైనదీ, పద్మములవంటి కన్నులు కలదీ అగు జగదంబయైన గౌరీదేవిని నేను స్తుతించుచున్నాను.

నిత్యః శుద్ధో నిష్కల ఏకో జగదీశః

సాక్షీ యస్యాః సర్గవిధౌ సంహరణే చ |
విశ్వత్రాణక్రీడనలోలాం శివపత్నీం
గౌరీమంబామంబురుహాక్షీమహమీడే || 6 ||

నిత్యుడు - శుద్ధుడు - పరిపూర్నుడు - ఒక్కడు - జగదీశుడు అగు పరమేశ్వరుడు గౌరీదేవి చేయు సృష్టి,స్ఠితి,లయలకు సాక్షి. ప్రపంచరక్షణము అను క్రీడయందు ఇష్టము కలదీ, శివుని భార్యయైనదీ, పద్మముల వంటి కన్నులు కలదీ అగు జగదంబయైన గౌరీదేవిని నేను స్తుతించుచున్నాను.

యస్యాః కుక్షౌ లీనమఖండం జగదండం

భూయో భూయః ప్రాదురభూదుత్థితమేవ |
పత్యా సార్ధం తాం రజతాద్రౌ విహరంతీం

గౌరీమంబామంబురుహాక్షీమమీడే || 7 ||

గౌరీదేవి గర్భమునందున్న సమస్తలోకములూ మరల మరల పుట్టుచుండును.లీనమగుచుండును.భర్తతోకలిసి వెండికొండపై విహరించునదీ, పద్మముల వంటి కన్నులు కలదీ అగు గౌరీదేవిని నేను స్తుతించుచున్నాను.

యస్యామోతం ప్రోతమశేషం మణిమాలా
సూత్రే యద్వత్క్వాపి చరం చాప్యచరం చ |
తామధ్యాత్మజ్ఞానపదవ్యా గమనీయాం

గౌరీమంబామంబురుహాక్షీమహమీడే || 8 ||

చరాచరరూపమైన ఈ ప్రపంచమంతయూ,దారము నందు మణులవలే గౌరీదేవియందే అల్లుకుని ఉన్నది. ఆధ్యాత్మ, జ్ఞానమార్గముచే తెలుసుకొనదగినదీ, పద్మముల వంటి కన్నులు కలదీ అగు జగదంబయైన గౌరీదేవిని నేను స్తుతించుచున్నాను.

నానాకారైః శక్తికదంబైర్భువనాని
వ్యాప్య స్వైరం క్రీడతి యేయం స్వయమేకా |
కళ్యాణీం తాం కల్పలతామానతిభాజాం
గౌరీమంబామంబురుహాక్షీమహమీడే ||9 ||

గౌరీదేవి తాను ఒక్కతెగానే ఉండి శక్తివంతములైన  నానారూపములతో లోకములనన్నిటినీ  వ్యాపించి స్వేచ్ఛగా క్రీడించుచున్నది. కల్యాణస్వరూపిణి , భక్తులపాలిట కల్పలత, పద్మములవంటి కన్నులు కలదీ అగు జగదంబయైన గౌరీదేవిని నేను స్తుతించుచున్నాను.

ఆశాపాశక్లేశవినాశం విదధానాం
పాదాంభోజధ్యానపరాణాం పురుషాణామ్ |
ఈశామీశార్ధాంగహరాం తామభిరామాం

గౌరీమంబామంబురుహాక్షీమహమీడే || 10 ||

తన పాదపద్మములను ధ్యానించు మనుష్యులకు ఆశాపాశములవలన కలుగు బాధలను నశింపచేయునదీ ,పరమశివుని అర్ధాంగి, పరమేశ్వరి, పద్మముల వంటి కన్నులు కలదీ అగు జగదంబయైన గౌరీదేవిని నేను స్తుతించుచున్నాను.

 ప్రాతఃకాలే భావవిశుద్ధః ప్రణిధానా-
ద్భక్త్యా నిత్యం జల్పతి గౌరిదశకం యః |
వాచాం సిద్ధిం సంపదమగ్ర్యాం శివభక్తిం
తస్యావశ్యం పర్వతపుత్రీ విదధాతి || 11||

ఎవడైతే శుద్ధమైన హృదయము కలవాడై భక్తితో ప్రాతఃకాలమునందు ఈ గౌరీదశకము స్తోత్రమును పఠించునో  అతనికి వాక్సిద్ధినీ, ఉన్నతమైన సంపదనూ, శివభక్తినీ గౌరీదేవి తప్పక ప్రసాదించును.

|| ఇతి శ్రీ శంకరాచార్య విరచితం గౌరీదశకం సంపూర్ణం ||